Cun pouco de retraso, a Anpa quere dar públicamente a
benvida á directora da escola, Gloria, que se reincorporou ao seu posto o día 23 de abril trala súa maternidade, pola que lle damos os nosos parabéns. A Anpa xa mantivo unha reunión con Gloria a mesma semana da súa volta; resumimos aquí os temas tratados:
1. A necesitade de que exista unha comunicación fluída entre a Anpa e a Dirección, polo que Gloria nos proporcionou o enderezo electrónico da escola. Pola súa banda, a Anpa puxo a disposición da Dirección o seu blog e a súa conta de correo electrónico.
2.. Tanto a Dirección como a Anpa puxeron de manifesto as ganas de colaborar e de traballar conxuntamente en beneficio dos nenos/as, pois entendemos que debe existir una relación estreita entre as familias e a escola.
3. Gloria mostrou a súa preocupación pola pouca implicación das nais e pais nas actividades da escola. A Anpa está de acordo con esta preocupación, polo que lle ofrecemos o noso apoio para motivar e dinamizar a participación dos pais e nais.
4. A Dirección puxo o seu ordenador a disposición de calquera pai ou nai que non teña correo electrónico e que estea interesada en acceder ao blog ou comunicarse coa Anpa dende a conta de correo da escola.
5. Tamén se recalcou que as principais novas que se poñan no blog serán colocadas tamén en carteis de aviso na porta de entrada da escola, de xeito que todos os pais e nais teñan acceso á información.
6. Como punto importante, Gloria insistiu na importancia de cumprir as normas da escola para o bo desenvolvemento das actividades diarias, en concreto é fundamental a puntualidade. A anpa xa ten recollidas no blog as normas da escola e invitou a Gloria a comunicarnos calquera modificación das mesmas para actualizalas no blog.
7. A directora mostrou a súa intención de que se continuaran facendo as actividades que estaban en marcha cando chegou. Tamén se mostrou moi interesada en organizar obradoiros relacionados coa música, por exemplo, contando coa colaboración dos pais e nais que tocasen algún instrumento.
8. Ademais, comentounos que lle gustaría organizar obradoiros adicados a profesións nos que se involucrasen pais e nais que teñan a profesión elexida. Tamén lle gustaría que os avós tiveran un espazo na escola.
9. Con respecto á excursión ao Auditorio, que se tivo que cancelar dúas veces por mor do mal tempo, mostrouse favorable a organizar ésta ou outra, pero sempre que a escola conte cun seguro escolar, do que de momento carece, xa que ela non asume o risco.
10. Gloria tamén recalcou que grazas ás melloras nas instalacións e ó novo material recibido na escola, atópase moi motivada e contenta de ver como a escola mellora.
11. Uns dos puntos da nosa conversa foi a falta de persoal no centro, e a necesidade de contar con mais persoal de apoio, xa que na escola existe unha alta taxa de baixas, e cubrir temporalmente os postos resulta complexo nalgunhas ocasións.
